Río Villanueva, José-Gerardo del

Canteiro e político, 42 anos. Casou en 1923 con Rosa Ageitos Abalo. Veciños de Cea. Emigrado na República Arxentina, ao seu regreso traballou de canteiro en Cea.

Paseado.

Despois do golpe de Estado, co seu medio irmán Paulino Carballo del Río, actuou como enlace dos fuxidos no monte Xiabre. O día 14/02/1937 subiu ao monte con Paulino para entregarlle unha carta da súa nai a José Torrado Herbón; prendeunos unha patrulla das milicias mandada polo capitán Bernal, que contaba con máis dun cento de homes entre militares, falanxistas e corpos de seguridade e que facían unha batida no monte de Xiabre.

Encarceráronos no cuartel da Garda Civil de Vilagarcía de Arousa e torturáronos.

Baixo o pretexto dun traslado a Pontevedra asasinounos aos dous o sarxento da Garda Civil Desiderio Camacho Pinillana, nas Raposeiras, preto de Vilanoviña, Santa María de Paradela.

O cura de Paradela non consentiu o soterramento en lugar sagrado e enterráronos en paralelo ao muro de peche do adro.

Morte rexistrada en Paradela por mor de atrición da substancia cerebral e de hemorraxia menínxea.