Camacho Pinillana, Desiderio

Garda Civil. Sarxento da Benemérita.

Represor.

A Paulino Carballo del Río e a José-Gerardo del Río Villanueva, que eran medio irmáns, encarceráronos no cuartel da Garda Civil de Vilagarcía de Arousa e torturáronos. Baixo o pretexto dun traslado a Pontevedra, o día 17/06/1937 o sarxento do posto de Vilagarcía de Arousa, Desiderio Camacho Pinillana, asasinou aos dous nas Raposeiras, preto de Vilanoviña, Santa María de Paradela, Meis (Pontevedra), ás 18:00 h, na estrada de Vilagarcía de Arousa-Nogueira.

Nunha das batidas e rexistros da Garda Civil e dos falanxistas do día 28/09/1938, un grupo que mandaba o sarxento Desiderio Camacho Pinillana e no que se incluían os números José Zúñiga Sánchez e Miguel López Codesal, acompañados polos falanxistas Luis Pintor Filgueira, Antonio Andrés Patiño e Roberto Abal Vázquez, rodearon a casa dos pais de Manuel Diz Fuentes e detivérono cando tentaba fuxir. Levárono ao cuartel da Garda Civil en Vilagarcía de Arousa, onde o torturaron e, esa mesma noite, ás 02:00 h, co pretexto da localización da cova de Areal, asasinárono no monte Xiabre na aplicación da Lei de Fugas.