Rodríguez Palacios, Florentino

Industrial e político, 40 anos. Casado cunha veciña de Santa Cruz de Mondoi, Oza dos Ríos (A Coruña), María López Lendoiro; non tiñan fillos. Veciños de Caborana, Aller. Tiñan un comercio de tecidos, ultramarinos e consumo xeral.

Concelleiro socialista no seu concello desde o ano 1922. Militante da Agrupación Socialista (AS) de Caborana. Alcalde de Aller polo PSOE de 1932 a 1936.

Arrestárono e procesárono pola súa suposta participación na folga xeral revolucionaria de outubro de 1934, que Florentino negou; condenárono a 12 anos e un día de cadea.

Paseado.

Achábase de vacacións coa súa dona en Mondoi, na casa dos seus sogros, cando se produce o golpe de Estado. Detido na noite do 21 ao 22/09/1936, seguramente por mor dunha delación de Bugallo, un veciño da casa dos seus sogros e que era das dereitas.

Nesas datas tamén prenderon en Santaia de Paderne o alcalde de Oza dos Ríos, Marcial Villaverde Viqueira, que andaba agochado.

Marcial e Florentino, con outras persoas, finaron paseados o día 23/09/1936. Os lugares de paseo habituais da zona eran a Costa do Sal e O Mesón do Vento. Marcial Villaverde, logo dunha pelexa cun garda, logrou fuxir.

A Florentino e a outros compañeiros fusiláronos nas veiras da Nacional VI, dentro do concello de Aranga, onde se rexistra a súa morte por mor de disparo de arma de fogo; roubáronlle un anel de ouro, un reloxo de ouro e os cartos que levaba enriba.

Morte rexistrada en Aranga por mor de disparo de arma de fogo; o xuíz sinala que se descoñece aos autores e ditou auto de sobresemento o 26/10/1936.

Soterrárono nunha fosa común no cemiterio de San Lourenzo de Vilarraso, Aranga.

A súa dona recoñeceu o seu cadáver cando se reabriu o sumario a finais de 1940.