Rodríguez Pico, Florentino

Mestre, 22 anos. Estudou Maxisterio na Escola Normal de Oviedo (Principado de Asturias) e foi mestre de Villarmeirín, Taladrid, Ibias (Principado de Asturias).

Membro da Agrupación Socialista (AS) de Villarmeirín.

Fuxido. Morte en enfrontamento.

Formou parte do Comité de Guerra de Muñas. Capitán do Batallón Bárzana, 10ª Brigada Mixta, 4ª División do III Corpo de Exército de Asturias. Coa caída de Asturias en outubro de 1937 fuxiu ao monte permanecendo na zona de Oscos. En 1938 era membro do grupo de César Terrón Abad, formado por antigos combatentes da fronte asturiana, na súa maioría cenetista, que actuaban ao norte de Ponferrada (León). Logo da morte de César Terrón o 21 de xullo de 1940, Florentino tomou o mando do grupo que pasou ao Bierzo.

Morreu nun enfrontamento coa Garda Civil nun piñeiral de Canedo o 18 de febreiro de 1941. Faleceron no combate seis guerrilleiros antifranquistas: Dalmiro Lamas Cerezales, Gerardo Lamas Mauriz, Luis Martínez Rodríguez, Gerardo González Ochoa, Pasoslargos, Brindis Mauriz Rodríguez e Florentino Rodríguez Pico. No enfrontamento tamén resultou morto o garda civil Nicasio González Arias.