Solleiro Rivera, Humberto

Empregado e sindicalista, 40 anos. Casado con Urania Mella Serrano; tiveron dous fillos e dúas fillas: Humberto, Raúl, Alicia e Conchita. Veciños da rúa Manuel Llaneza, 7, en Santa Cristina de Lavadores, Vigo. Empregado da Compañía de Tranvías Eléctricos de Vigo da que o seu sogro era o director.

Militante do PCE e do Consello Sindical Ferroviario da UXT de Vigo. Presidente do Sociedade Cultural e Deportiva de Lavadores, que se adicaba á defensa do deporte xuvenil, e dirixente local da Asociación de Amigos da Unión Soviética.

Executado.

Humberto e a súa dona participaron, no Calvario, na preparación da defensa de Lavadores fronte aos golpistas despois da declaración do estado de guerra. Logo da caída da cidade nas mans rebeldes foxen e detéñenos en Redondela (Pontevedra).

Xulgado en consello de guerra en Vigo polo delito de rebelión militar co resultado de sentenza á pena de morte.

Fusilárono os golpistas en Vigo ás 16:00 h.

Morte rexistrada en Vigo por mor dunha profusa hemorraxia interna.

Nesa data e lugar pasearon a: Francisco González Martínez, labrego; Gabino González Martínez, serrador; Miguel Gómez Pardo, xastre, e Humberto Solleiro Rivera, empregado.

Á súa dona tamén a condenaron á pena de morte, que lle conmutaron pola de cadea perpetua. Os fillos quedaron ao cuidado da familia do pai, que eran partidarios da sublevación.