Blanco Solla, Antonio

Canteiro e político, 38 anos. Casado. Veciños de Marín. Mestre construtor de obras.

Militante do PSOE. Alcalde de Marín de maio de 1931 a outubro de 1934. Pertencía á Sociedade de Canteiros de Marín, vencellada á UXT. Candidato a Cortes nas eleccións de 1933 polo PSOE, non acadou acta de deputado. Alcalde tamén nas eleccións de febreiro de 1936 e compromisario para a elección do presidente da República, Manuel Azaña Díaz, en abril de 1936.

Executado.

Cando se produce o golpe de Estado formou parte do Comité de Defensa da República en Marín; ordenaron a requisa de armas o día 19 de xullo. No comité estaban: Antonio Blanco Solla, Santiago Ramos Ramos, Andrés Santos Rodríguez, Bernardino de la Torre Fernández, Rafael Jaén Rodríguez e Francisco Crespo, entre outras persoas.

A Antonio Blanco detivérono os sublevados o día 20/07/1936.

Xulgado en consello de guerra sumarísimo en Pontevedra polo delito de rebelión militar o día 18/12/1936, na causa 558/36, co resultado de sentenza á pena de morte.

Ingresado na Colonia Penitenciaria da Illa de San Simón, Redondela (Pontevedra), de onde o sacaron para asasinalo.

O día 31/12/1936 fusilaron no Monte Porreiro en Pontevedra a: Albino Agraso Santamaría, zapateiro; Antonio Blanco Solla, canteiro; Amando Iglesias Pérez, mariñeiro; Demetrio Lorenzo Ordóñez, xornaleiro; Santiago Ramos Ramos, canteiro, e Bernardino de la Torre Fernández, albanel.