Castro Pena, Manuel

Mestre e político. Casado en 1931 con María-Sara Meijide Salgado; tiveron catro fillos e tres fillas: José-Luis, Juan-José, María de la Paz, Marina, Manuel María del Carmen e Rafael. Veciños da Estrada. Mestre de Rubín (A Estrada) e, no ano 1934, da Estrada.

Presidente da Asociación de Mestres Nacionais na Estrada.

Falanxista. José-Antonio Primo de Rivera Sáenz de Heredia nomeouno delegado de Falanxe en Pontevedra e a primeiros de xullo de 1936 designárono xefe provincial de Falanxe en Pontevedra.

O día 01/05/1936 enfrontouse, cos seus irmáns, á manifestación dos obreiros na Estrada; ferido e detido, pasou un mes na cadea.

O día 06/07/1936 estivo, con outros, na prisión da Cañiza, onde se abordou o próximo golpe militar.

O día 13/07/1936, falanxistas que el dirixía con Víctor Lis Quibén, tentaron tomar a cidade de Pontevedra, acción que frustrou a Garda de Seguridade e Asalto. Despois disto e poucos días antes de que se producira o golpe dos rebeldes botouse ao monte con outros dez camaradas de Pontevedra e non volveron ata o triunfo da sublevación.

Golpista. Represor.

Sumouse inmediatamente ao movemento rebelde. Presentouse na Estrada como xefe provincial de Falanxe e obrigou aos seus veciños a construír a estrada do Arnado-Codesedo (A Estrada) ata a súa casa en Parada, secundado polo matón Ramón Bao Lagares.

En xaneiro de 1937 destituírono, pero en xullo de 1938 nomeárono delegado de Investigación e Información de Falanxe Española Tradicionalista e das Xuntas de Ofensiva Nacional Sindicalista (FET-XONS) en Ourense.

En 1939 pasou a traballar na Secretaría Política do ministerio da Gobernación.