Iturralde Cabeza de Vaca, Francisco

Funcionario e anarcosindicalista, 40 anos. Casado. Veciño de Ferrol. En 1920 coñeceu á que sería a súa muller, Marina Ochotorena, deixando a carreira de Medicina, na que levaba tres anos, e ingresou como Oficial no Corpo de Telégrafos. Pasou por varios destinos en España, en 1923-1924 estivo na Coruña. En 1930 destinárono a Pontevedra. Desde 1933 era veciño de Ferrol, onde o contrataron como mecánico interino de Telégrafos.

Vencellado en Pontevedra á CNT e ás actividades da Federación Anarquista Ibérica (FAI), circunstancias polas que o expulsaron do Corpo de Oficiais de Telégrafos en xaneiro de 1933.

En maio dese ano 1933 fundou a Escola Racionalista de Ferrol; a escola atopábase no seu domicilio na rúa Canalejas, 159-1º. Francisco daba clases aos maiores a a súa dona aos máis pequenos. Ao precisarse unha titulación, a escola púxose a nome de Matías Usero Rey-Torrente, licenciado en Dereito e militante republicano.

Colaborou co xornal coruñés Brazo y Cerebro.

Coa chegada en febreiro de 1936 da Fronte Popular (FP), deixou a escola racionalista e artellou unha Universidade Popular, proxecto inconcluso por mor da sublevación militar.

Fuxido. Paseado.

Cando se produce o golpe rebelde escondeuse en Ponto, Xuvia, Santa María de Neda, Neda (A Coruña) e, logo, nas Somozas (A Coruña), onde o prenderon os fascistas e trasladárono á prisión da Escollera, en Ferrol.

Xulgado en consello de guerra en Ferrol co resultado de sentenza de sobresemento.

Pouco despois rexístrase a súa morte en Ferrol a mans da forza pública franquista.

A súa dona e os seus fillos trasladáronse a Lugo.