López Bello, Amadeo

Mestre e político, 32 anos. Casado coa tamén mestra Concepción Vieites, desterrada e morta en Madrid. Veciños de San Pedro de Beiro, Carballeda de Avia. Irmán da mestra Carmen López Bello, depurada. Estudou Maxisterio na Escola Normal de Ourense e rematounos en 1927. Mestre nacional de Beiro.

Nos primeiros tempos da II República militou no Partido Republicano Radical Socialista (PRRS). Os seus ideais eran o anticaciquismo e a redención dos labregos por mor da educación. Participou en moitos actos políticos e mitins e tiña malas relacións co clero.

Membro da Asociación de Traballadores da Ensinanza de Ourense (ATEO), da que foi fundador, dirixente e redactor do seu voceiro.

Redactor de Escuela de Trabajo e colaborador da revista Nós.

Socio do Seminario de Estudos Galegos.

Detido en Ourense na folga xeral revolucionaria de outubro de 1934; acusárono de presidir un comité comunista.

Presidente do Comité pro-Estatuto en Carballeda de Avia.

Depurado. Fuxido. Encarcerado. Paseado.

Os franquistas depurárono do Maxisterio, cesárono e destituírono como mestre a primeiros de agosto de 1936 por ser un dos dirixentes de ATEO.

Despois do golpe rebelde ocultouse varias semanas, detivérono os rebeldes e ingresárono na Prisión Central de Celanova (Ourense), onde tentou suicidarse e de onde o sacaron os facciosos para pasealo.

Morte rexistrada na Poza das Ras a causa dunha hemorraxia interna por traumatismo.

Os fascistas pasearon ese día a: Julio González Álvarez, Amadeo López Bello, Eloy Romero Luis e Silvio Torres Díaz; os cadáveres apareceron na Poza das Ras, en Ourille.