Lustres Rivas, José-Manuel-Antonio

Xornalista, escritor e político, 48 anos. Casado con Emilia Fernández. Veciños de Vigo (Pontevedra). Comezou os estudos de Medicina na Universidade de Santiago de Compostela (USC), tempo no que participou nos faladoiros do Café Colón. Pasou uns anos na República Arxentina a onde marchou en 1923, durante a ditadura de Miguel Primo de Rivera Orbaneja.

Comezou a súa vida política no agrarismo, no galeguismo, republicano moderado e contrario ao caciquismo rural. Militante da UXT.

Como xornalista desenvolveu a súa profesión nunha gran variedade de xornais: El Miño, El Heraldo Gallego, Galicia Nueva, Faro de Vigo, Gaceta de Galicia, La Concordia, La Zarpa. Tamén exerceu o xornalismo en Madrid: España Nueva, España Libre, El Liberal, La Voz, El Sol. Ao regresar de Madrid traballou como redactor xefe do xornal vigués Galicia. Escribiu ensaio e comedia.

Membro dunha sociedade masónica.

Paseado.

Nos primeiros días da guerra civil, a primeiros de agosto, prendérono os fascistas nas instalacións do Faro de Vigo e ingresárono na Colonia Penitenciaria da Illa de San Simón, Redondela (Pontevedra), de onde o sacaron os represores franquistas con outras persoas, o día 09/11/1936, para asasinalo.

As persoas asasinadas nesta saca foron: Vicente Bautista García; Víctor Fraiz Castellanos, empregado; Manuel Herbón Fontán; José-Manuel-Antonio Lustres Rivas, xornalista; Siro Moralejo Santos; Manuel Nores Portela, industrial; Abdón Simón da Ponte e Florentino Vázquez Doval.

Morte rexistrada na estrada Redondela-Vigo, na Cuncheira, a causa de disparos de arma de fogo.