Navarret García, Enrique

Mariñeiro, 36 anos. Casado. Veciño de Ribadeo (Lugo). Irmán de Antonio Navarret García, procesado.

Membro da Sociedade Obreira.

Fuxido. Paseado.

Xulgado en consello de guerra en Lugo o día 02/08/1936 polo delito de rebelión militar, na causa 309/36, co resultado de ser declarado fuxido e en rebeldía. Proceso contra varios veciños de Ribadeo.

A sentenza deste proceso condenou á pena de morte a: Fernando Bellón Fernández, Antonio Fernández Sánchez e Luciano Martínez Piñeiro; penas de cadea perpetua para: José Castaño Reimundo, Francisco Rodríguez Monteavaro e Luciano Rodríguez Monteavaro; tamén castigaron a prisión a José-Antonio Díaz Álvarez. O auto declarou fuxidos a: Florencio Carballo Novigil, Santiago Fariña Reinante, Enrique Navarret García, José-María Torviso Fernández e Andrés Vale Blanco.

Despois de andar fuxido prendérono os franquistas e ingresárono no depósito de Ribadeo o día 02/08/1936, de onde o sacaron o día 11 de setembro para darlle o paseo.

Morte rexistrada no Prado dos Remedios por mor de feridas de arma de fogo na caluga e no tórax.

Inscrito inicialmente como descoñecido e identificado o día 08/02/1979.

Asasinouno o xefe comarcal de milicias de Falanxe Española Tradicionalista e das Xuntas de Ofensiva Nacional Sindicalista (FET-XONS) Pablo de la Fuente Aguirre, quen xustificou a execución cun intento de fuga.

Nese lugar e data asasinaron a: Florencio Carballo Novigil, mariñeiro; Antonio-María Martínez López, labrego; Enrique Navarret García, mariñeiro, e Andrés Vale Blanco, xornaleiro.

Soterráronos nunha fosa común en Mondoñedo.