Santalla Orjales, Manuel

Labrego, 38 anos. Veciño de Porto co Cabo.

Fuxido. Encarcerado.

Fuxido dende o comezo da guerra en xullo de 1936.

Formou nun grupo de fuxidos na zona da Capelada, entre Cerdido e Cariño. Neste grupo estaban: José Rey Díaz, Torradas, morto en marzo de 1938; Nicasio Pérez Senra e José López Teijeiro, abatidos tamén en marzo de 1938; Manuel Orjales Bouza, Labrada, e Andrés Brañas Rodríguez, Carrizo, detidos en decembro de 1938 e condenados á pena de morte, e Manuel Santalla Orjales, detido en marzo de 1939. A súa única pretensión era a supervivencia.

Xulgado en consello de guerra en Ferrol polo delito de rebelión militar, na causa 23/37, co resultado de sentenza á pena de morte.

No sinalado procedemento condenaron á pena de morte a: Manuel Orjales Bouza e Manuel Santalla Orjales; pasearon a José Ambrós Gordillo; declararon fuxido a José Rey Díaz e ditaron sentenza de sobresemento para Manuel Rey Díaz.

Xulgado en consello de guerra en Ferrol por roubo e o asasinato de tres homes, na causa 432/38, co resultado de sentenza á pena de morte.

Neste procedemento tamén castigaron coa pena de morte a Manuel Orjales Bouza.

Xulgado no ano 1939 no Tribunal Militar Territorial de Ferrol (A Coruña) polo delito de rebelión militar, na causa 286/39, co resultado de sentenza á pena de morte.

Pena de morte conmutada na comisión de exame de penas da Coruña pola de cadea perpetua.

Procesárono no Tribunal Rexional de Responsabilidades Políticas da Coruña e indultárono no 1941.