Vilas Romero, Perfecto-Félix

Mineiro, 24 anos. Irmán de Antonio Vilas Romero, tamén paseado e fusilado, e de Secundino-Dionisio Vilas Romero, procesado.

Militante da CNT.

Paseado.

Xulgado na causa 233/38 por participar no atraco ao veciño de Rois José Caamaño con Avelino Méndez Suárez, o Asturiano.

Perfecto-Félix agochouse para non incorporarse a filas coa quinta de 1933. Houbo unha delación e un comando da Garda Civil, que dirixía o cabo José Ríos Peiteado, achegouse ata Marcelle e arrodearon a casa de María-Josefa Becerra Laíño (de 48 anos), onde se agochaba co Asturiano, que consegue fuxir.

Perfecto tentou escapar, abatérono a balazos e José Ríos rematouno a sangue fría. Velárono alí mesmo, no monte, pois non deixaron levantar o seu cadáver. Entre outras persoas, velárono María-Josefa, quen o agochara a noite anterior, e o irmán de Perfecto, Antonio Vilas Romero (de 18 anos). O día 24 de febreiro, o día seguinte, os gardas civís volveron por Marselle e sacaron das súas casas a María-Josefa e a Antonio e paseáronos.

Morte rexistrada nun piñeiral en Marselle, cando tentaba fuxir do acoso da Garda Civil, por mor de feridas producidas por arma de fogo.

Soterrárono nunha fosa común no cemiterio de Santa Eulalia de Vilacova.