Méndez Suárez, Avelino

Mineiro e sindicalista, 21 anos. Veciño de Lousame.

Anarquista asturiano. Pertencía ao Sindicato de Mineiros e Profesións Varias das Minas de San Fins, en Lousame.

Paseado.

Cando se produce o golpe militar marchou cos mineiros de Lousame cara Santiago de Compostela (A Coruña) e despois á capital provincial para facer fronte aos golpistas. Agochado no monte desde 1936.

Acusado con Perfecto-Félix Vilas Romero do asalto en Rois á casa de José Caamaño. Consegue fuxir da redada de Marcelle na que a Garda Civil rematou coa vida do seu compañeiro de fuxida Vilas Romero.

Formou parte da Partida de Curuxás, que dirixía Ramón Rodríguez Varela, Curuxás.

Por este grupo pasaron: Hilario Arroyo Medina, Medina; José-Luis Castro Veiga, o Piloto; José Díaz; Manuel Fernández Valle, Portafondón; Benedicto Fuentes Díaz, Benedicto da Rula, Antón; Leonardo Gómez Pérez, Trancas; Celestino Horta Resúa; Jesús-María Iglesias Escourido, Franco, o Tizón, Caudillo; Avelino Méndez Suárez, Asturiano; Lisardo Núñez; Guillermo Paredes Viñas, Guillermo da Canteira; Ramón Rodríguez Varela, Curuxás; Abdón Telesforo Vázquez e José Vázquez Otero. Actuaron na zona de Lousame.

Despois dun roubo nas Minas de San Fins, o día 14/04/1937, tentaron pasar ao Principado de Asturias; ao non conseguilo volveron agocharse nos montes de Lousame.

Avelino comezou a emborracharse a a acosar sexualmente ás mulleres; reprendido polos compañeiros, non mellorou as súas actitudes e por non querer axustizalo a propia guerrilla, denunciárono á Garda Civil, que lle deu morte o 24 de abril nunha galería da Fiosa. A partida da Garda Civil que o asasinou dirixía o cabo José Ríos Peiteado.

Morte rexistrada en Lousame por mor de feridas producidas por arma de fogo.

O seu cadáver apareceu na Fiosa e soterrárono nunha fosa común no cemiterio de Vilacoba.