Balboa López, José

Militar, 26 anos. Veciño de Santiago de Compostela (A Coruña). Militar da Armada. Irmán de Benjamín Balboa López, exiliado; Jesús Balboa López, encarcerado e fuxido coa guerrilla, e de Carmen Balboa López, encarcerada e depurada.

Executado.

Ingresou no servizo militar en marzo de 1936 e destinárono onde o seu irmán Benjamín, na Estación de Radio de Ciudad Lineal (Madrid). Estaba de garda o día 18 de xullo cando se producen os comunicados de Franco desde África para sumar a todos os mandos á rebelión. Benjamín fíxose coas mensaxes, saltou a cadea de mandos e comunicou a sublevación ao Goberno legal.

Co tempo a Benjamín Balboa López nomearíano subsecretario de Mariña e deulle algúns destinos importantes a José, entre outros, o de xuíz instrutor en Málaga e o de maxistrado do Tribunal Especial Popular en Murcia ata o día 20/11/1936, onde asinou varias sentenzas de morte contra mariños sublevados, pero tamén salvou a vida de moitos outros.

Detido polos franquistas en abril de 1939 cando se toma Cartagena, sometérono a consello de guerra sumarísimo que comezou o 01/05/1939. Condenárono á pena de morte por adhesión á rebelión militar e oposición aos sublevados.

Fusilado por un piquete da Infantería de Mariña ás 06:00 h do día 29 de maio no Campo de Deportes do Arsenal de Cartagena.

Semella que o soterraron nunha fosa común no cemiterio dos Remedios, en Cartagena.