Barreiro González, Josefa

Labrega e limpadora de casas, 26 anos. Casada co anarcosindicalista e mariño mercante José Tobío, sobriño da libertaria Olivia Tobío; tiveron dous fillos: Julio e Valentín. Veciños de Trabanca Badiña, Santa Baia de Arealonga, Vilagarcía de Arousa.

Militante da CNT.

Executada.

Despois do golpe militar e pola mediación da súa tía política Olivia Tobío, agochou na súa casa a un amigo do seu home, un anarcosindicalista de 26 anos, Urbano Tarrío Montero, de Rubiáns, ao que buscaban os fascistas para asasinalo.

O seu home xa tiña fuxido a Francia, onde tempo andado se reuniría cos seus fillos.

A Garda Civil e falanxistas veciños presentáronse na súa casa o día 17/03/1937, asasinaron a Urbano sen máis miramentos e detiveron a Josefa, á que levaron aos locais de Falanxe onde a torturaron e déronlle tal malleira que a deixaron medio morta.

Fusilárona “como incursa en un delito de guerra”.

Para fusilala, por mor do seu estado, tiveron que sentala nunha cadeira e despois de cribala a tiros deixárona morta no mesmo lugar.

Soterrárona nunha fosa común en Vilagarcía de Arousa.