Tarrío Montero, Urbano

Labrego e sindicalista, 26 anos. Veciño de Rubiáns. Labrego por conta allea.

Militante da Federación Local da CNT en Vilagarcía de Arousa.

Fuxido. Morte en enfrontamento.

Despois do golpe militar rebelde Rodrigo Beruete Alejandre fuxiu e organizou un grupo guerrilleiro, nos montes Xiabre e Lobeira; grupo que inicialmente formaron: Rodrigo Beruete Alejandre, Ángel Buceta Loroño, Ramón Rodríguez Carregal, Francisco Baamonde García, Manuel Martínez Freire, José Torres Eiras e Serafín Brea Otero. Logo incorporáronse ademais: Urbano Tarrío Montero, Manuel Limeres Ordóñez, Juan Gil Quintela, Antonio-Basilio Sayanes González, Pilar Fernández Seijo e Manuel Díaz Hermo.

Despois do golpe militar e pola mediación da súa tía política Otilia Tobío, Josefa Barreiro González, labrega e limpadora de casas, agochou na súa casa de Santiago de Carril a un compañeiro anarcosindicalista de 26 anos, Urbano Tarrío Montero, ao que buscaban os falanxistas e os gardas cívicos para asasinalo.

Os falanxistas, que mandaba Mouriño, presentáronse na casa de Josefa, asasinaron a Urbano sen máis miramentos e detiveron á dona á que levaron aos locais de Falanxe, onde a torturaron e déronlle tal malleira que a deixaron medio morta. Para fusilala e por mor do seu estado, tiveron que sentala nunha cadeira e despois de cribala a tiros deixárona morta no mesmo lugar o seguinte día 19.

Xulgado en consello de guerra en Pontevedra polo delito de rebelión, suspendéronse as actuacións por morte en “acción de guerra” en Vilagarcía de Arousa.