Casas González, Jesús

Labrego e político, 36 anos. Casado con Anuncia Rodríguez Maceda; tiveron catro fillas: Aurelia, Inés, Rosario e Gloria. Veciños de Santo Estevo de Eirexalba, O Incio. De mozo emigrou a Cuba, onde casou con Anuncia e naceron as dúas fillas maiores. Regresaron a Galicia no ano 1928.

Militante libertario, desenvolveu unha importante actividade política. Delegado en 1936 da Sociedade Republicana de Labregos de Santa María de Goó, O Incio. Concelleiro do Incio, propuxérono para alcalde.

Paseado. Sancionado.

Cando se produce o golpe de Estado agochouse na aldea de Covadelas, Santa María de Saa, A Pobra do Brollón; detivérono os fascistas o día 06/08/1936. Torturárono e paseárono os da Escuadra Negra de Eirexalba, que comandaban Manuel Díaz López, Chaquetón, e Manuel Castro Castro, Eirexalba, no Alto de Santa Lucía de Saa.

Morte rexistrada por mor de hemorraxia torácica a causa de maltrato.

O seu cadáver apareceu na Pobra do Brollón.

Posteriormente ábreselle un expediente e sanciónano por responsabilidades políticas.

Pouco despois, o día 09/08/1936, a Escuadra Negra de Eirexaalba executou ao seu cuñado Ramón Rodríguez Maceda, polo “delito” de asistir ao seu enterro.

A súa viúva Anuncia, a súa sogra Carmen Maceda Macía e o seu cuñado Antonio Rodríguez Maceda marcharon vivir á casa coñecida como Casa do Inverno, onde prestaron refuxio e axuda aos fuxidos.

O día 11/05/1939 forzas da Garda Civil de Monforte de Lemos e Sarria tomaron por asalto esta casa. No enfrontamento, por mor do estoupido dunha bomba de man, morre o tenente Manuel Castro Lebón e os guerrilleiros Benigno Díaz González e Enrique de Vigo, que se agochaban alí desde 1937; outro fuxido puido escapar. Pouco despois e a causa das feridas recibidas, morreu Carmen Maceda, de 72 anos.

A Anuncia e a Antonio detivéronos e condenáronos en consello de guerra á pena de morte. Pena conmutada pola de cadea perpetua. Anuncia morreu na cadea de Lugo, por mor dunha tuberculose, o día 31/12/1941.

Procesárono por responsabilidades políticas e indultárono no ano 1961.