Fábrega Coello, Manuel

Médico, 61 anos. Casado cunha veciña de Lubián (Zamora), non tiveron fillos. Veciños de Lubián, onde exerceu a medicina ao longo de 30 anos. Curmán de Luis Fábrega Coello, encarcerado.

Membro da Asociación Republicana Radical desde 1932; participou na campaña a favor da Fronte Popular (FP) nas eleccións de febreiro de 1936.

Executado.

Cando os militares sublevados controlaron a comarca das Portelas (nos límites de Galicia, Castela-León e Portugal) prendérono e enviárono á prisión de Zamora.

A Manuel acusárono de acoller na súa casa ao xeneral de división republicano Juan García Gómez-Caminero, Inspector Xeral do Exército e a dous militares, que o acompañaban, antes de que cruzaran cara Portugal o día 19/07/1936.

Xulgado en consello de guerra polo Tribunal Militar Territorial de Zamora polo delito de rebelión militar, na causa 194/36, co resultado de sentenza á pena de morte.

Inculpado no Tribunal Rexional de Responsabilidades Políticas de Valladolid.

Fusilárono os falanxistas nas tapias do cemiterio zamorano con outras persoas.