Fernández Miniño, José

Industrial e político, 42 anos. Casado con Consolación Pereiro Trelles; tiveron catro fillos e unha filla: Antonio, Carmen, José, Jesús e Enrique. Veciños do Porriño. Irmán de Eduardo Fernández Miniño, paseado polos fascistas; Rogelio Fernández Miniño, tamén paseado, de Antonio Fernández Miniño, agochado e encarcerado, de Carmen Fernández Miniño e Saladina Fernández Miniño, as dúas encarceradas.

José era, segundo fontes familiares, era zapateiro e zoqueiro  no Porriño e abriu, ademais, un pequeno almacén de curtidos, en Tui en 1934, para subministrar a outros zapateiros da comarca da Louriña pontevedresa. As mesmas fontes sinalan que era anarquista (da FAI ou da CNT).

Formou parte da Comisión Agraria-Obreira. Algúns dos seus irmáns eran do PCE. Tamén mantivo relación co Centro de Estudos Sociais e Científicos do Porriño.

Paseado. Depurado.

Despois do golpe de Estado prendérono e sometérono a un proceso militar. Ingresárono na cadea de Tui, de onde o sacaron para asasinalo.

Morte rexistrada na Volta da Moura a causa de “encuentro con las tropas del Ejército”. Con el tamén asasinaron a Joaquín Alonso Granados.