Froiz Gómez, Jesús

Funcionario, xornalista e poeta, 34 anos. Casado; deixaba tres fillas e un fillo, Fernando, de seis meses. Veciños de Lalín. Durante a II República foi garda municipal.

Colaborador de varios xornais. No ano 1928 era correspondente de Faro de Vigo en Lalín. Primeiro director de La Nueva España e logo redactor de Razón. Tamén colaborou con A Nosa Terra, xornal galeguista, e con La Zarpa.

Militante do Partido Galeguista (PG) de Lalín desde 1934. Participou na campaña electoral de 1936 a favor da Fronte Popular (FP) e na do Estatuto de Autonomía de Galicia (EAG).

Paseado.

Despois do golpe préndeno os rebeldes o día 04/08/1936 e ingrésano na prisión de Lalín ata que o sacaron para pasealo.

Na noite do 8 ao 9 de outubro de 1936 a Garda Civil e os falanxistas preséntanse na cadea de Lalín para recoller a Manuel Guillán Abalo e a Jesús Froiz Gómez, co pretexto de trasladalos á cadea de Caldas de Reis (Pontevedra). Os mesmos gardas pasan logo por Silleda (Pontevedra) e recollen a Ramón Muíños Lorenzo. Con estes presos diríxense á Estrada.

Esa mesma noite do 8 de outubro, outro grupo da Garda Civil sacan da Prisión Provincial de Pontevedra, coa desculpa de levalos á prisión da Estrada, a Severino García Teijeiro, a José-Domingo González Boullosa e a Juan Bacariza Sánchez.

As dúas expedicións xúntanse na Ponte do Regueiro, no quilómetro 23 da entrada Chapa-Carril, finando asasinados os seis conducidos entre as 04:00 e as 05:00 h do día 09/10/1936. Os gardas que fixeron os disparos serían o corneta Casimiro Álvarez Rincón e o garda segundo Agustín López Ferreiro. O chofer do coche de Pontevedra era o garda Alejandro Pérez González. Non sorprende xa a estas alturas que a xustificación dos axustizamentos fora pola aplicación da Lei de Fugas.

Os corpos soterráronos no cemiterio da Estrada.

Morte rexistrada na Ponte do Regueiro.

Neste mesmo lugar e data asasinaron de madrugada a: Juan Bacariza Sánchez; Jesús Froiz Gómez, xornalista; Severino García Teijeiro, practicante; José-Domingo González Boullosa, tapiceiro; Manuel Guillán Abalo, mestre, e Ramón Muíños Lorenzo, obreiro.