Gama Casalderrey, Manuel

Comerciante e político, 40 anos. Veciño de San Salvador de Lérez, Pontevedra. Irmán de Alejandro Gama Casalderrey, encarcerado, e de Faustino Gama Casalderrey, paseado; á súa irmá Custodia Gama Casalderrey tamén a encarceraron. No ano 1936 nomeárono administrador interino do sanatorio da Lanzada Miguel Gil Casares.

Dinamizador político e divulgador do marxismo entre a clase obreira pontevedresa nos anos trinta. Ligado desde mozo á Sociedade de Labregos de Lérez, impulsou a creación da Caixa Rural de Lérez en 1925, da que sería xerente ata 1934. Manuel foi un líder agrarista e dirixiu a Federación Comarcal Agraria de Pontevedra.

Colaborou en Nueva Aurora, El Pueblo Gallego, Vida Agraria, El Campesino e Revolución. Un dos fundadores de Juventud Lerezana, entidade cultural e recreativa.

Durante a II República elixírono concelleiro de Pontevedra na candidatura obreiro-agraria, de tendencia comunista, no ano 1931. Tamén formou parte da candidatura comunista nas eleccións xerais de 1933; era do PCE desde a ditadura de Miguel Primo de Rivera Orbaneja.

Encarcerado. Sancionado.

Despois do golpe prendérono os golpistas e ingresárono na prisión o día 26/07/1936; deixárono en liberdade o día 18/01/1938.

Condenado a tres meses de arresto por non pagar unha sanción de 3000 pesetas, multa que se lle impuxera o día 21/10/1937.

Detido de novo o día 09/03/1938.

Xulgado en consello de guerra Pontevedra polo delito de auxilio á rebelión o día 13/07/1938, na causa 317/38, co resultado de sentenza á pena de morte.

Pena de morte conmutada na comisión de exame de penas de Pontevedra pola de cadea perpetua e despois pola de 12 anos de prisión menor.

Padecía unha tuberculose ósea e percorreu varios cárceres.

Pasou a prisión atenuada en 1943, residindo no Grove (Pontevedra).

Procesárono no Tribunal Rexional de Responsabilidades Políticas da Coruña e indultárono no ano 1958.