González Calviño, Ramón

Zapateiro e político, 49 anos. Casado coa labrega Vicenta Cudeiro Caseiro; tiveron tres fillas e dous fillos: Josefina, Ángel, Julio, Luisa e Maruja. Veciños da rúa Raíña Victoria, 31, en Ourense. A súa filla Josefa González Cudeiro tamén pasou pola cadea.

Executado.

Despois do golpe militar Enrique Nanín Ansias agachouse na casa dos irmáns Ángel González Cudeiro e Julio González Cudeiro. Delatados por un veciño, detivéronos aos tres o día 26/03/1937; tamén detiveron ao pai destes irmáns, Ramón González Calviño.

Xulgado en consello de guerra en Ourense polo delito de auxilio á rebelión, na causa 612/37, co resultado de sentenza á pena de morte.

O tribunal condenou á pena de morte a Ramón González Calviño; pena de prisión para Vicenta Cudeiro Caseiro; autos de absolución para: Ángel González Cudeiro, Josefina González Cudeiro e Julio González Cudeiro; sobresemento do proceso para Antonio Nanín Ansias. Tamén enxuizaron neste procedemento a Enrique Nanín Ansias.

Fusilado no Campo de Aragón do Cuartel de San Francisco, en Ourense.