Losada Estévez, Cándido

Obreiro, 28 ou 29 anos. Veciño de Santa María da Cabeza da Vilavella, A Mezquita (Ourense). Obreiro do ferrocarril.

Militante da UXT e afiliado á Agrupación Socialista (AS) de Puebla de Sanabria (Zamora) desde 1930.

Fuxido.

Despois do golpe de Estado participou cos leais na resistencia ao alzamento e no asalto ao cuartel da Garda Civil de Nueva Puebla, Requeixo de Seabra (Zamora). Logo marchou ao monte con varios compañeiros.

Aos dous meses fuxiron a Portugal e, desde alí, a Francia en maio de 1938. Regresaron á zona republicana e destinárono á 43ª División no val de Bielsa (Huesca); logo loitou en Ripoll (Xirona) e Vic (Barcelona).

Prendérono os rebeldes o 15/10/1938 en Tremp (Lleida) e levárono a un campo de concentración en Zaragoza, logo a Bilbao (Biscaia) e a Miranda de Ebro (Burgos), onde se deu á fuga na estación do tren.

Uniuse á guerrilla na zona da Gudiña-A Mezquita. Mantiña moitos contactos cos portugueses e vivía a cabalo da liñar fronteiriza hispano-portuguesa, subministrando armas á Federación de Guerrillas de León-Galicia (FG).

Formou parte do grupo que dirixía Domingo Rodríguez Rodríguez, Inca.

En 1951 Antolín Murías, Paciencia, contactou con César Ríos Rodríguez, quen se encargaba das evacuacións cara Francia; cando tiñan todo preparado, renunciou á evacuación pois quería levar con el a Cándido Losada Estévez, quen finalmente consegue exiliarse en Francia no verán de 1952.

Certas fontes sinalan que naceu en Castromil, Hermisende (Zamora).