Rodríguez Rodríguez, Domingo

Labrego, 27 anos. Veciño de Corzos.

Fuxido. Sancionado. Exiliado.

Cando se produce o alzamento foxe e únese á guerrilla.

Despois da sublevación a súa nai morreu queimada cando os falanxistas da zona lle prenderon lume á casa familiar.

Formou parte do grupo de Alfredo Yáñez Domínguez, Aguirre, e onde tamén estaban Panarra, Serio, José Vega Seoane, Ánimas, e Sinsegundo; todos eran antigos membros da Sociedade Obreira e Campesiña de Santa María de Xares, A Veiga. Actuaban na Cabreira, Ponferrada, Viana do Bolo, O Bolo, O Barco de Valdeorras e A Gudiña.

Militante do PCE.

Xulgado no Tribunal Militar Territorial de Ourense polo delito de asasinato, na causa 7/37, co resultado de ser declarado fuxido e en rebeldía.

Declararon fuxidos neste proceso a: Juan-José Rodríguez Couso, Domingo Rodríguez Rodríguez e Alfredo Yáñez Domínguez.

En febreiro do ano 1937 os franquistas embargáronlle os seus bens.

Trasladouse á zona republicana do Principado de Asturias.

A primeiros dos anos corenta era xefe dun grupo guerrilleiro, que actuaba na Serra de Corzos e na Terra do Bolo e de Valdeorras, dentro da II Agrupación da Federación de Guerrillas de León-Galicia (FG).

Nesta partida figuraban, entre outras persoas: Mario Morán García, Arcadio Ríos Rodríguez, Alfredo Yáñez Domínguez e José Vega Seoane.

Máis tarde incorporouse ao grupo de Cándido Losada Estévez, Malvavisco.

No ano 1948 logrou fuxir de Galicia e exiliarse en Francia; morreu na rexión de París.