Maceiras Amor, Antonio

Labrego, 20 anos. Veciño rúa da Cañota, 10, en Betanzos (A Coruña). O maior de cinco irmáns.

Afiliado ao Sindicato de Profesións Varias de Betanzos, da CNT.

Paseado.

Segundo a testemuña de Jesús Lavandeira Pérez, o Ladrillo, Antonio combateu contra os franquistas nas barricadas da Ponte Nova, onde esquecera unha prenda que o delataría con posterioridade e prenderíano os represores.

Paseado nun monte da Reborica, xunto cos tamén betanceiros José Edreira Seoane e Antonio López Pérez.

No Rexistro Civil de Aranga non aparece ningún dos tres. A familia de Edreira buscouno, remataron por dar con eles e acháranos comestos dos cans e de aves carroñeiras. Una testemuña mantén que Edreira apareceu coas súas partes na boca.

Segundo o folleto Betanzos honra a sus mártires, os corpos non os soterraran e os cans e as aves de presa remataron cos seus restos. Os seus irmáns nunca souberon onde o asasinaran e fálase de tres persoas e non de dúas. O mesmo cre a irmá de Edreira; isto puxo sobre a pista de Antonio López Pérez, o Bergeiro.