Penabad Rodríguez, Pedro

Avogado e escritor, 29 anos. Compañeiro de Carmen Millán; tiñan unha filla. Veciños de Madrid. Emigrado en Cuba, coa súa nai, cando quedara orfo de pai; alí estudou Dereito e depórtano no ano 1931. Vive en Vigo (Pontevedra), na Coruña e no ano 1934 instálase en Madrid.

Presidente de Prensa Hispana Unida e director de Suplemento.

No ano 1935 afíliase ao Partido Galeguista (PG) en Madrid, desde onde colabora na propaganda a favor do Estatuto de Autonomía de Galicia (EAG).

Executado.

Cando comeza a guerra civil, Ramón Suárez Picallo, entre outras persoas, chamouno para que confeccionase o regulamento das Milicias Populares Galegas, das que foi un dos seus xefes. En agosto de 1936 era axente de vixilancia na Brigada de Investigación Criminal e principal colaborador de Agapito García Atadell.

No desenvolvemento da guerra civil a García Atadell nomeárono xefe das Milicias Populares de Investigación.

Segundo a prensa franquista posterior instalaron unha checa de 48 axentes no Pazo dos Condes de Rincón, en Madrid; practicáronse numerosas detencións e rexistros domiciliarios; estas milicias practicaron unhas 800 detencións, recadando grandes sumas en cartos, xoias e obras de arte. Os fascistas tamén acusaron a García Atadell de participar en xuízos falsos que, as veces, remataron en penas de morte. A súa unidade tamén actuou contra quintacolumnistas, sabotadores, francotiradores e espías. A prensa dos rebeldes creou no seu entorno a imaxe da gran transcendencia da súa capacidade represiva, que está lonxe da realidade.

No mes de outubro de 1936, por mor da mala imaxe que se estaba a crear del, García Atadell foxe cara Francia coa súa dona, algúns colaboradores, entre eles Pedro Penabad Rodríguez e a súa parella, e un botín que se estimou nuns 25 millóns de pesetas, segundo os represores.

O réxime franquista rematou por convertelos en “símbolos do terror vermello”.

Cando viaxaban en barco desde Francia cara América, detivéronos o día 24/11/1936 en Santa Cruz de La Palma, La Palma (Santa Cruz de Tenerife).

Xulgado en consello de guerra en Sevilla co resultado de sentenza á pena de morte e asasinado no garrote no patio do cárcere de Sevilla.