Poza Juncal, Laureano

Profesor, practicante e político, 27 anos. Casado o día 06/03/1937 en Madrid coa tamén profesora Elisa-Susana-Agustina Díaz Riva; tiveron un fillo e dúas fillas: Joaquín, Elisa-Vitoria e Pilar (os tres naceron no exilio). Veciños de Pontevedra. Fillo de Joaquín Poza Cobas e de Pilar Juncal Verdulla. Irmán de Pilar Poza Juncal, depurada; César Poza Juncal, procesado; Joaquín Poza Juncal (+1934), e Hernán Poza Juncal, tamén exiliado. Estudou Químicas en Oviedo (Principado de Asturias) cun expediente excepcional. Profesor de Química Industrial Orgánica e Análise Químico na Escola Industrial de Vigo (Pontevedra) e no instituto desta cidade.

Militante da UXT en Vigo.

Dirixente da Federación Universitaria Escolar (FUE). Socio do Centro Republicano de Pontevedra. Militante de Acción Republicana (AR) e logo de Esquerda Republicana (ER). Participou nos mitins da campaña electoral de febreiro de 1936.

Pertencía á masonería.

Depurado. Exiliado.

Ao producirse o golpe de Estado incorporouse ao 5º Rexemento de Milicias en Madrid. Despois foi tenente na 1ª División do Exército do Centro. Desenvolveu distintos cargos administrativos para o Goberno da República.

Despois do golpe militar Laureano e Elisa acabaron depurados dos seus postos de traballo como profesores e exiliáronse en México, onde exerceron labores educativas na universidade.

O día 09/02/1939 cruzaron a fronteira cara Francia e internárono no campo de concentración de Saint Cyprien; coa axuda do Servizo de Evacuación de Refuxiados Españois (SERE) embarcaron o 12/06/1939 no vapor Ipanema e chegaron a Veracruz (México) o día 07/07/1939.

Procesárono no Tribunal Rexional de Responsabilidades Políticas da Coruña e indultárono no ano 1941.

Tamén o procesafron en 1940 no Tribunal Especial para a Represión da Masonería e o Comunismo.