Rodríguez Sáez, Blanca

Casada co garda de asalto de 41 anos Juan Rico González; tiveron unha filla e dous fillos: Blanca (15 anos), Juan (14 anos) e Alfonso (5 anos). Veciños de Pontevedra. O seu home era capitán da Garda de Seguridade e Asalto e mandaba a 31ª Compañía en Pontevedra.

Sancionada. Exiliada.

O capitán Rico avisara ao gobernador civil, Gonzalo Acosta Pan, dos preparativos golpistas, pero o gobernador non lle prestou demasiada atención; o día 18 de xullo reuniuse coas Xuventudes Socialistas (XXSS) e dirixentes da Fronte Popular (FP) para entregarlles armas.

Ao seu home fusilárono con outras oito persoas o día 12/11/1936 na Caeira, San Salvador de Poio, Poio (Pontevedra).

Ás familias destes fusilados o 12 de novembro sancionáronas cunha multa mancomunada dun millón de pesetas, embargándolles bens e propiedades.

Morto o seu home, Blanca marchou a Porto (Portugal) cos seus fillos, onde recibía cartos da familia que tiña en México. Pasados dous anos trasladáronse a Santiago de Compostela (A Coruña) para que Juan estudase Medicina. Os seus fillos Juan e Alfonso exiliáronse en México, onde os seguiu a súa nai anos máis tarde.

A súa filla maior Blanca Rico Rodríguez, casou con Jaime Quintanilla Ulla, fillo do tamén paseado Jaime Quintanilla Martínez, alcalde de Ferrol.