Saco López, Camilo

Mestre e político, 33 anos. Solteiro. Veciño de Monforte de Lemos. Ingresou canda o seu irmán Cesáreo Saco López no Seminario Menor de Monterroso (Lugo); no ano 1919 pasaron ao Seminario Maior de Lugo. Cara o ano 1923 deixaron o seminario e pasan a estudar bacharelato no Instituto de Lugo. Mestre nacional da escola de Calvos, Santa Mariña do Monte, Monforte de Lemos.

Vogal da Organización Republicana Lucense no ano 1931. Presidente do Partido Galeguista (PG) en Monforte de Lemos no ano 1936

Depurado. Encarcerado.

Os franquistas abríronlle un expediente de depuración como mestre.

Detido o día 20/07/1936 e encarcerado co seu irmán Cesáreo na Prisión Provincial de Lugo.

Xulgado en consello de guerra en Lugo o día 18/10/1936 polo delito de rebelión militar, na causa 176/36, co resultado de sentenza a cadea perpetua segundo resolución do día 17/11/1936.

Neste proceso condenaron a cadea perpetua a: Antonio Buján Vigo, Marcelino Campos Blanco, Bienvenido de Castro Ves, Miguel García Ramos, Marcelino García Valdés, Manuel Gay Fernández, José Martínez Álvarez, Camilo Saco López, Cesáreo Saco López e Manuel Vilar Rodríguez.

Trasladado á Prisión Provincial da Coruña o día 20/03/1937 co seu irmán. No cárcere coruñés, con Cesáreo, desenvolveron un intenso labor pedagóxico entre os presos.

Pena ordinaria conmutada pola comisión de exame de penas de Lugo e puxérono en liberdade o día 02/07/1940.

No ano 1944 tivo que fuxir de Monforte de Lemos por mor dunha nova orde de detención; arrestárono en Madrid no ano 1946, con Cesáreo e con Ramón Piñeiro López, e encarcerárono na cadea en Alcalá de Henares (Madrid) ata o ano 1948.

Despois exerceu de mestre en Monforte de Lemos.