Sánchez Rapela, Ramón

Labrego e político, 34 anos. Casado; tiñan tres fillos. Veciños de Andavao. Emigrado en Cuba.

Concelleiro de Boimorto cando se produce o golpe de Estado de 1936.

Tiña como compañeiros na Corporación de Boimorto de 1936, entre outras persoas, a: Pedro López Bodelo (alcalde), encarcerado; José Cabanas Vázquez, encarcerado; José Tojo García, asasinado; Ramón Vázquez Garea, asasinado; Manuel Espiñeira López, asasinado; Antonio Felpete Budiño, asasinado; José Barreiro Pérez, asasinado; Juan Martínez Bao, asasinado; Ramón Enjamio Pombo, asasinado.

Paseado.

Entrou na lista dos 17 de Emilio Freire, cura de San Miguel de Boimil e de San Martiño de Andavao, as dúas en Boimorto. Convocado polos falanxistas á reunión preto da escola da Gándara, Santiago de Boimorto, Boimorto.

“Ponte lo del domingo”, dixéronlle os falanxistas a Ramón cando foron a por el. Estaba a sachar nunha finca en Orros e nin chistou cando o prenderon; nada malo fixera.

Despois de prendelo e torturalo, morreu asasinado no Amenal o 20 de agosto con outros catro compañeiros. Os seus familiares aínda non saben hoxe se era concelleiro ou un simple afiliado ao Sindicato Labrego, próximo á UXT.

Soterrárono nunha fosa común en Agra da Vila, sen rexistro documental.

Outras fontes reflicten o día 17 de agosto como data destes pasamentos.