Serrano Valls, Rafael

Militar, 15 anos. Casou en Ordes (A Coruña) no ano 1946 con Blanca del Río Carballido; tiveron catro fillos: Rafael, Alberto, José-María e Jaime. Tenente da Garda Civil.

Represor.

Cando se produce o movemento golpista, con 15 anos, alístase nas Forzas Regulares Indíxenas de Tetuán, que mandaba o seu pai Alberto Serrano Montaner. No ano 1941 ascende a tenente provisorio.

No ano 1945 pasou á Garda Civil e destinárono como xefe de liña a Ordes, coa encomenda de limpar de guerrilleiros a zona, converténdose nun implacable represor. Propoñía ao gobernador civil da Coruña o desterro das familias como castigo, co fin de previr que calquera dos seus membros apoiase ou colaborase con parentes na guerrilla.

O día 21/04/1947 dirixiu o operativo represor que acabou coa vida de Manuel Ponte Pedreira, Xastre, no Fontao, Santo Estevo de Abella, Frades (A Coruña).

Destinado á comandancia da Garda Civil en Ferrol (A Coruña), sería o responsable da eliminación de Francisco Martínez Leira, Pancho, o día 31/12/1954, en Santa María de Ombre, Pontedeume (A Coruña).

No mes de xuño de 1966 era o xefe do 40º Terzo da Garda Civil na Coruña. No ano 1979 promovérono ao grao de xeneral de brigada con destino en Logroño e Cádiz. En xaneiro de 1981 era xefe da 1ª Zona da Garda Civil en Madrid e estivo ao mando das forzas da Garda Civil, que arrodearon o Congreso no intento de golpe de Estado do 23/02/1981.