Sobrido Allés, Rita

Casada co mestre e político Germán Adrio Mañá, viúvo da súa irma Nieves Sobrido Allés (+decembro 1932) e que deixara cinco orfos, a maior con oito anos. O seu home estudara Ciencias Exactas en Salamanca, sen rematar; en 1927 acadou o título de Mestre Superior e exerceu de mestre nacional, director e propietario do Colexio X de Pontevedra; tamén traballou de mestre do plano profesional da Graduada de Pontevedra.

Germán fora concelleiro de Pontevedra na ditadura de Miguel Primo de Rivera Orbaneja, militante da UXT e da Agrupación Socialista (AS) de Vilagarcía de Arousa e tamén concelleiro na República.

Sancionada.

Ao seu home fusilárono con outras nove persoas no Monte da Caeira, San Salvador de Poio, Poio (Pontevedra), no quilómetro 1 da estrada de Campañó, o día 12/11/1936.

Coas familias dos outros fusilados tivo que facer fronte a unha multa dun millón de pesetas, polo que lle embargaron bens e propiedades.

Seguiu a vivir en Pontevedra, convivindo cos represores e traballando duro no seu taller de bordado para manter á súa familia. Coa axuda doutra das fillas do seu home, Maruja, conseguiron que Germán Adrio Sobrido puidera rematar a carreira de Medicina.