Adrio Mañá, Germán

Mestre e político, 48 anos. Xa viúvo de Nieves Sobrido Allés (+1932) e con cinco fillos, casou coa súa cuñada Rita Sobrido Allés. Pai de Nieves Adrio Sobrido, depurada. Estudou Ciencias Exactas en Salamanca, sen rematar; en 1927 acadou o título de Mestre Superior. Mestre nacional, director e propietario do Colexio X de Vilagarcía de Arousa. Tamén mestre do plano profesional da Graduada de Pontevedra.

Concelleiro de Pontevedra na ditadura de Miguel Primo de Rivera Orbaneja. Militante da UXT e da Agrupación Socialista (AS) de Vilagarcía de Arousa. Concelleiro na súa vila natal na II República.

Executado. Depurado.

Arrestárono despois do golpe fascista.

Xulgado en consello de guerra sumarísimo Pontevedra, o día 01/11/1936, polo delito de traizón co resultado de sentenza á pena de morte.

Fusilado con outras nove persoas no Monte da Caeira, no quilómetro 1 da estrada de Campañó.

Nesta acción asasinaron: os médicos Amancio Caamaño Cimadevila, Luis-Telmo Bernárdez Santomé e Luis Poza Pastrana (cuñado de José Adrio Barreiro); os mestres Paulo Novás Souto, Germán Adrio Mañá, Benigno Rey Pavón; o editor Ramiro Paz Carvajal; o avogado José Adrio Barreiro; o xornalista Víctor Casas Rey e o capitán da Garda de Seguridade e Asalto Juan Rico González.

Ábreselle un expediente de depuración como mestre nacional.