Rey Pavón, Benigno

Mestre e político, 28 anos. Solteiro. Fillo de Arturo Rey Juncal (+1935) e de Sofía Pavón, encarcerada; as súas irmás Teresa, Lola, Fefa e Sofía tamén sufriron cadea. Veciño de Pontevedra. Estudou Maxisterio na Escola Normal de Pontevedra. Mestre nacional desde 1931 e destacado deportista da ximnasia. Mestre interino de San Pedro de Lantaño, Portas (Pontevedra) en 1933. En 1936 era mestre de Penzol, Merelo, Vegadeo (Principado de Asturias).

Militante do Partido Galeguista (PG) en Pontevedra, semella que desde xuño de 1931, e despois no de Ribadeo (Lugo).

Dirixente da Sociedade Ximnástica de Pontevedra.

Executado.

Cando se produce o golpe de Estado achábase de vacacións en Pontevedra, participa na requisa de armas, na convocatoria de folga xeral e na tentativa de impedir a saída das tropas á rúa.

Remata detido polos franquistas e ingresado na Escola Normal de Pontevedra, convertida entón en cadea.

Xulgado en consello de guerra sumarísimo en Pontevedra o día 31/10/1936 polo delito de traizón, na causa 660/36, co resultado de sentenza á pena de morte.

Neste xuízo procesaron e condenaron á pena de morte a: José Adrio Barreiro, Luis-Telmo Bernárdez Santomé, Víctor Casas Rey, Ramiro Paz Carvajal, Luis Poza Pastrana, Benigno Rey Pavón e Juan Rico González.

Ingresado na Colonia Penitenciaria da Illa de San Simón, Redondela (Pontevedra).

Fusilado con outras nove persoas no Monte da Caeira, no quilómetro 1 da estrada de Campañó.

Nesta acción asasinaron a: os médicos Amancio Caamaño Cimadevila, Luis-Telmo Bernárdez Santomé e Luis Poza Pastrana (cuñado de José Adrio Barreiro); os mestres Paulo Novás Souto, Germán Adrio Mañá e Benigno Rey Pavón; o editor Ramiro Paz Carvajal; o avogado José Adrio Barreiro; o xornalista Víctor Casas Rey e o capitán da Garda de Seguridade e Asalto Juan Rico González.