López Ardao, José

Militar, 35 anos. Veciño de Xavariz, Santiago de Pantín, Valdoviño (A Coruña). Mariño, cabo fogueiro na Base Naval de Marín (Pontevedra). Irmán de Jesús López Ardao, o de Someiro; Baltasar López Ardao, Baltasar de Zacotos, paseado, e de Manuel López Ardao, Manuel de Zacotos, tamén encarcerado. A súa irmá, María López Ardao, casara con Evaristo Eive Vilar.

Fillo de Constantino López, quen se rebelara contra do cura de Santa Olaia de Soaserra, Cabanas, con outros veciños, por mor do pago da oblata e abrazaran o protestantismo facía uns dez anos, en 1926.

Encarcerado. Depurado.

O día 25/07/1936 chegou de permiso e detívoo a Garda Civil de Pontedeume (A Coruña) o día 27 co seu irmán Manuel López Ardao. Acusáronos de acubillar na súa casa a Francisco Cernadas Veloso, cabo do cruceiro lixeiro Miguel de Cervantes e que andaba fuxido desde a sublevación. A Francisco prenderíano con posterioridade.

Xulgado en consello de guerra en Ferrol (A Coruña) polo delito de rebelión militar (causa contra varios veciños de Fene) co resultado de sentenza a oito anos e un día de prisión menor.

Pena ordinaria conmutada no ano 1940 e puxérono en liberdade en outubro dese ano.

Despedírono do seu posto de traballo.