López Verdes, Ermitas

Mestra e escritora. Casada co avogado, funcionario, escritor e político Luis Peña Novo; pais do médico Luis Peña López. Veciños de Lugo.

No ano 1918 pertencía á sección feminina das Irmandades da Fala da Coruña, da que foi tesoureira. O seu home era das irmandades desde 1916.

En 1933 integrouse na Agrupación Republicana Feminina.

Luis Pena sería o primeiro concelleiro electo do Partido Galeguista (PG); nas eleccións do 08/02/1920 elixírono concelleiro da Coruña na candidatura nacionalista; mantivo este cargo ata 1923, cando se proclama a ditadura de Miguel Primo de Rivera Orbaneja; participou o día 25/09/1930 no Pacto de Barrantes.

Durante a II República a Luis elixírono deputado por Lugo en 1931; foi membro da comisión redactora do proxecto do Estatuto de Autonomía de Galicia (EAG) pola Federación Republicana Galega (FRG), gobernador civil de Cáceres, Sevilla e Valencia e gobernador xeral de Estremadura; vicepresidente de Unión Republicana (UR) no ano 1936, compromisario para a elección de Manuel Azaña Díaz como presidente da República

Vítima colateral.

Cando se produce o golpe de Estado o seu home era secretario do Concello de Lugo, prendérono os golpistas, ingresárono en cadeas, deportárono e separárono do servizo con suspensión de emprego e soldo; deixou a vida política e adicouse a exercer a avogacía na súa terra.

No ano 1962 trasladáronse a Madrid, onde vivía o seu fillo; nun retorno a Vilalba desde a capital finou, coa súa parella, nun accidente de tráfico na Robra.