Abella Galán, José

Cobrador, 36 anos. Casou en San Xoán de Pravio, Cambre, o día 16/04/1937 con Carmen Calviño Varela; tiveron dúas fillas e dous fillos: María del Carmen, Maruja, Luis e Francisco. Veciños da rúa da Torre, 33, na Coruña. Era o máis pequeno de seis irmáns. Traballou na Fábrica de Gas da Coruña como cobrador.

En 1932 era vogal da Sociedade de Obreiros Gasistas, Electricistas, Augas e semellantes; en 1933 do Sindicato de Camareiros Terrestres, da CNT; vogal segundo do Casino Republicano coruñés en decembro de 1933. Militante do Partido Republicano Radical Socialista (PRRS) e, despois, de Esquerda Republicana (ER), da que era vicesecretario da Agrupación da Coruña no ano 1935 e pola que foi elixido compromisario para a elección do presidente da República Manuel Azaña Díaz.

Paseado. Desaparecido.

Despois da revolta militar acusárono de ser unha das persoas máis afectas ao gobernador civil Francisco Pérez Carballo.

Semella que no ano 1937 desaparece. Segundo fontes familiares prendérono as milicias armadas Caballeros de La Coruña ou os japistas a altura do actual nº 54 da rúa da Torre, na Coruña.

Paseárono, pero non aparece nas listaxes oficiais de fusilados nin na de desaparecidos.

Existe unha ficha policial do día 11/01/1938 na que se sinala como morto “al intentar fugarse”, segundo un informe da Garda Civil.

Segundo a base de datos Nomes e Voces tiña como alcume Galán. Outras fontes sinalan que só era o seu segundo apelido.