Arias Carujo, Robustiano

Tiña 23 anos.

Militante do PCE.

Fuxido. Morte en enfrontamento.

Cando se produce o golpe militar loitou na fronte asturiana contra os franquistas na 2ª Compañía de Montaña da Intendencia Militar de Asturias e León desde o 01/02/1937.

Detido e encarcerado polos rebeldes en Astorga (León), de onde foxe o día 29/09/1942 e únese ás partidas da guerrilla.

Miguel Cuellas Gómez, Artillero, era o responsable de que o seu grupo estivera agochado en Columbrianos, na casa de Catalina Martínez Núñez, en contra das ordes superiores, pois sospeitábase que ese domicilio xa o controlaban as forzas represoras.

Xulgado en consello de guerra en León na causa 67/43 e na causa 340/43.

Despois da delación da confidente e antiga enlace Evangelina Álvarez Álvarez ao capitán da 4ª Compañía da 108ª Comandancia da Garda Civil, Felipe Romero Alonso, a casa rexistrárona o día 05/06/1945 un numeroso grupo de gardas civís e membros do Exército.

Os guerrilleiros agochábanse nun falso teito da cociña da casa duns 50 cm de alto; descuberto o agocho, forzas represoras de Astorga e Ponferrada, metralláronos ata a morte, sen que puideran defenderse e morreron os tres fuxidos: Miguel Cuellas Gómez, Artillero; Robustiano Arias Carujo, Felipe, e Manuel Moreno Casado, Pucherillo, Andaluz. Á dona da casa, Catalina Martínez Núñez, cribárona a tiros na habitación contigua e ao seu sobriño, Pedro García Tirado, responsable de ter construído o agocho e que estaba fóra do domicilio, conducírono e matárono ao carón da súa tía.

Como consecuencia da desfeita de Columbrianos, a moitos enlaces e colaboradores descubríronos. Ao día seguinte, o 6 de xuño, caeu Ángel Ovalle Bodelón, de Camponaraia (preto de Ponferrada), un dos colaboradores máis activos. Traballaba en Mineiro Siderúrxica de Ponferrada (MSP), onde o buscaron membros da Garda Civil; fuxiu e alcanzárono no monte Castro, en Columbrianos, onde o remataron de oito tiros de mosquetón e 13 de subfusil.