Brandariz Souto, Felisardo

Tiña 21 anos. Solteiro. Veciño da Coruña. Fillo de José Brandariz Ramos, fusilado en 1938.

Militante da CNT. Membro das Xuventudes Libertarias (XXLL).

Encarcerado. Executado.

Era soldado de Infantería en Burgos.

Integrouse nunha rede clandestina confederal despois da sedición militar. Detido nas operacións da policía represora que seguiron á aniquilación da cúpula da Federación Anarquista Ibérica (FAI), na coñecida como “Caída das Atochas” do día 10/07/1937.

Xulgado en consello de guerra na Coruña polo delito de rebelión militar, na causa 1007/37, co resultado de sentenza á pena de morte segundo resolución do día 30/10/1937.

Ditáronse as seguintes condenas de pena de morte para: Jaime Baella Pérez, José Brandariz Ramos, Felisardo Brandariz Souto, Marcelino Calviño Pato, Ángel Fernández Fernández, Jesús López Cabado e Ricardo Martín González; cadea perpetua para Juan Aguiar Brandariz; 20 anos de cadea a: Juan Couzo Martín e Manuel Lantes Fernández; a Roberto Seoane Ferreño castigárono a 15 anos.

Preso no Castelo de San Antón, na Coruña.

Na agarda do cumprimento da condena, fuxiu o día 28/01/1938 con José Varela Bouza, Pepe o Lobo, despois de serrar os barrotes da prisión cunha lima que lles trouxera, nunha barra de pan, a dona de José.

Na fuxida prenderon a Felisardo e fusilárono pouco despois co seu pai.

Xulgado en consello de guerra na Coruña pola fuxida da prisión, na causa 93/38, con José Varela Bouza.

Fusilárono os golpistas ás 06:00 h en Punta Herminia, na Coruña.

Soterrárono o día 9 de marzo nunha fosa común no cemiterio de San Amaro, na Coruña, con Jaime Baella Pérez, José Brandariz Ramos, Marcelino Calviño Pato, Ángel Fernández Fernández, Jesús López Cabado, Ricardo Martín González e Cándido Sánchez Rodríguez.