Búa Carou, Francisco-Agustín-Juan

Funcionario e político, 48 anos. Casado. Veciño de Cangas (Pontevedra). Irmán de José Búa Carou, procesado. Secretario do concello de Portas en 1916, de Tomiño en 1925 e do Rosal en 1927, todos concellos da provincia de Pontevedra. Chegou a Cangas en marzo de 1936 para substituír ao secretario Jesús Cordeiro, suspendido pola Fronte Popular (FP) por irregularidades; contratárono como secretario interino.

Militante do PSOE.

Encarcerado. Morte na cadea.

Despois do triunfo dos militares rebeldes prendérono e ingresárono no cárcere de Cangas.

Xulgado en consello de guerra sumarísimo en Pontevedra, o día 19/09/1936, polo delito de auxilio á rebelión co resultado de sentenza a cadea perpetua.

Neste consello de guerra xulgaron a: Francisco-Agustín-Juan Búa Carou, funcionario; Lorenzo-Santiago-Vitoriano Corbacho Rodal, canteiro; Agustín Jorge Etcheverri, médico (alcalde de Cangas); José-Modesto Rodal Lanzós, mariñeiro, e Víctor Sánchez Mártil, mestre.

Pena ordinaria conmutada na comisión de exame de penas de Pontevedra.

Ingresado na Colonia Penitenciaria da Illa de San Simón, Redondela (Pontevedra) o día 14/10/1936.

Trasladado ao Forte de San Cristóbal, onde ingresa o 16/05/1937 e onde se rexistra a súa morte por mor dunha caquexia.