Jorge Echeverri, Agustín

Médico e político, 34 anos. Veciño de Cangas (Pontevedra). Licenciado en 1927 en Medicina pola Universidade de Santiago de Compostela (USC). Médico no pósito de Cangas desde 1927 e xuíz municipal no ano 1933. Irmán do tamén médico Ángel Jorge Echeverri, depurado.

En 1931 era presidente do Círculo Republicano Radical en Cangas e representante do Partido Republicano Radical (PRR) en Pontevedra. Un dos fundadores e primeiro presidente de Esquerda Republicana (ER) de Cangas no ano 1935. Alcalde de Cangas pola Fronte Popular (FP) en 1936, substituíndo a Francisco Eiroa Graña.

Encarcerado. Executado.

Despois do golpe militar prendérono o día 23 de xullo e ingresárono na cadea en Cangas e, máis tarde, trasladárono á Prisión Provincial de Pontevedra.

Ingresado na Colonia Penitenciaria da Illa de San Simón, Redondela (Pontevedra).

Xulgado en consello de guerra sumarísimo en Pontevedra o día 19/09/1936 polo delito de rebelión militar, na causa 790/36, co resultado de sentenza á pena de morte.

O tribunal militar condenou á pena de morte a: Lorenzo-Santiago-Victoriano Corbacho Rodal, Agustín Jorge Etcheverri, Antonio Fernández Fernández, José Meis Martínez, José-Manuel Millán Costas, Víctor Sánchez Mártil e Antonio Varela Vázquez; castigaron coa cadea perpetua a: José-Miguel Carracelas Álvarez, Germán Chapela Leiro, Francisco Cordeiro Refojo, Gumersindo Gastiasoro Ruiz de Azúa, Serafín Gómez González, Joaquín-José Nores Rodríguez e José-Modesto Rodal Lanzós; penas de 20 anos de cadea para Ismael Costas Caamaño; sentenzas de 12 anos e un día para: Manuel Díaz Carballo, Manuel González Dantas, Manuel Sotelo Alonso, Juan Valladares Taboada e Valentín Villar Soliño; pena de seis anos e un día para Evaristo Dobarro Landín; tamén sentenciaron á cadea a Eduardo García Santos; ditaron auto de absolución para: Eugenio Bermúdez Piñeiro, Ramón Costas Otero, Rafael Rodal Lanzós e Manuel Sotelo Suárez; sobresemento para: Indalecio Cruz Ramos; declararon fuxido a José Moreira Espiño. Tamén enxuizaron a: Aniceto Franco Durán, Estanislao Mallo Martínez, Jesús-Daniel Millán Costas, Rufino Miranda Cabral, Ángel-Emilio Nores Rodríguez, Manuel Piñeiro Pastoriza, Ángel Rial Vidal, Camilo Rodal Rodal, Secundino Ruibal Villar, Vicente Sáez Ruiz, Luis Soliño Acuña e Adonis-Jesús Teixeira Alonso.

Fusilárono os franquistas en Pontevedra.

Algunhas fontes manifestan como segundo apelido Etcheverri.