Campo Canedo, Adoración

Dona do guerrilleiro Edelmiro Alonso García, Delmiro.

Fuxida. Exiliada.

Adoración uniuse á resistencia despois de que en febreiro de 1941, nun enfrontamento no seu domicilio de Canedo, morreran cinco guerrilleiros a mans da Garda Civil cando se agochaban na súa casa e dos que era enlace; tamén morreron tres gardas.

O dia 27/10/1948 un grupo de cinco resistentes agochados da aldea de Castañeiras, Balboa (León) sostivo un enfrontamento con forzas da Garda Civil, no que morreu o número da Benemérita, Sabas Andrés Salazar. Os guerrilleiros que lograron fuxir eran: Manuel Gutiérrez Abella; Edelmiro Alonso García, Delmiro; Pedro Lamas Cerezales; Oliveros Fernández Armada, Negrín, e Adoración Campo Canedo.

Aos donos da casa onde se acubillaban, Vicenta López Digón, de 48 anos, e ao seu fillo Jesús Camuñas López, de 20 anos, labrego e solteiro, prendéronos e, no traslado á prisión de Villafranca del Bierzo (León), asasináronos na aplicación da Lei de Fugas, ás 21:00 h do día 28/10/1948. Vicenta era enlace da resistencia desde facía varios anos.

Adoración conseguiu fuxir con varios compañeiros en taxis ata Bilbao (Biscaia) e logo pasaron a Francia, aproveitando unha viaxe en tren de afeccionados da Real Sociedade, que se desprazaran a un partido de fútbol entre o seu equipo e o Athletic de Bilbao.