Campos Villar, José

Labrego, comerciante e político, 65 anos. Casado.

Detido en abril de 1929, baixo a acusación de agresión ao secretario do concello, Manuel Fernández González.

Agrarista e representante da Federación Labrega de Cambados-Caldas de Reis. Alcalde de Campo Lameiro nos primeiros anos vinte. Novamente alcalde de Campo Lameiro en 1930 e tamén durante a II República. Militou en Acción Republicana (AR). Destituído con toda a corporación en outubro de 1934. Integrouse en Esquerda Republicana (ER) da súa localidade e repuxérono como alcalde en febreiro de 1936. O día 08/03/1936 recibiu unha homenaxe de recoñecemento en Campo Lameiro.

Encarcerado. Morte na cadea.

Cando se produce o golpe de Estado detivérono os sediciosos.

Xulgado en consello de guerra en Pontevedra o día 04/02/1937 polo delito de rebelión militar, na causa 1136/36, co resultado de sentenza a cadea perpetua.

Neste consello de guerra condenaron a cadea perpetua a: Timoteo Blanco Abal, José Campos Villar e Vicente-Santiago Soto Martínez; a 15 anos de cadea castigaron a José-Elías Silva Caneda, a 12 anos a Adolfo Caeiro García e a tamén a prisión a Manuel Fuentes Cerviño. Descoñécese a sentenza que lle correspondeu a Lorenzo Silva Barros. Auto de sobresemento provisorio para Emilio González Castro e declaración de fuxido e en rebeldía para Benito-Gabino Méndez Rodríguez.

Ingresado na Colonia Penitenciaria da Illa de San Simón, onde se rexistra a súa morte por mor de enfermidade (neoplasia).