Fernández Pérez, José

Dependente, sindicalista e político, 41 anos. Veciño de Ourense. Auxiliar de farmacia.

Membro da Agrupación de Dependencia Mercantil e Bancaria, da UXT, que presidiu en 1935. Membro da Agrupación Socialista (AS) de Ourense da que foi presidente en 1935 e secretario en 1936.

Concelleiro de Ourense en 1931 e deputado provincial con posterioridade.

Formou parte das loxas masónicas Jovellanos nº 1 de Oviedo (Principado de Asturias) e Triángulo Adelante nº 7 e Constancia nº 7 de Ourense.

Pertenceu ao Comité Revolucionario de Ourense durante a folga xeral revolucionaria de outubro de 1934.

Fuxido. Executado.

Ao producirse o golpe militar agachouse na casa dunha irmá ata que o capturaron o 20/02/1937.

Xulgado en consello de guerra en Ourense polo delito de rebelión militar, na causa 391/37, co resultado de sentenza á pena de morte.

Neste procedemento condenaron á pena de morte a: José Fernández Pérez, Enrique Nanín Ansias e Severino Nóvoa Gutiérrez; penas de 12 anos e un día para: Luis Acuña Novoa, Patricio Arce Susilla e José Pérez Gómez; ditaron auto de absolución para Ramiro Pérez Serrano e declararon fuxido a Luis Vidal.

Fusilado no Campo de Aragón do Cuartel de San Francisco, en Ourense.

Fusilaron nese día a estas cinco persoas: José González Tesouro, Machadiña; José Fernández Pérez, Pepe da Botica; Severino Nóvoa Gutiérrez; Enrique Nanín Ansias e Gerardo Rodríguez Fernández, Gerinaldo.