Mejuto Bernárdez, José-Gabriel

Mecánico e sindicalista, 30 anos. Casou en 1930 con Alejandra Nogueira Lagoa; tiveron dúas fillas e dous fillos: Isabel, Josefina, Fernando e Manuel, todos eles de menos de sete anos cando executaron ao seu pai. Veciños de Cangas. Estudou na Escola Industrial de Vigo (Pontevedra) e traballou en talleres de Bouzas e de Vigo, desde o ano 1928, como mecánico naval. No ano 1930 montou un taller propio en Cangas.

Militante da UXT de Vigo, membro do Sindicato Metalúrxico e da Agrupación Socialista (AS). Formou parte da primeira célula comunista de Cangas con Ángel-Emilio Nores Rodríguez, paseado.

Executado.

Despois do golpe militar segue a residir en Cangas, onde o ameazaron os falanxistas; algún deles eran os seus propios parentes políticos. O día 20/09/1936 prendérono nunha redada da Garda Civil e das XAP en Teis, Vigo, cando estaba na casa das súas medio irmás. Acusárono de ser “comunista de los que no dan la cara”.

Tivérono preso no frontón da rúa María Berdiales, en Vigo, e na Colonia Penitenciaria da Illa de San Simón, Redondela (Pontevedra). Deixou 35 cartas escritas desde esta última prisión, entre 1936 e 1937.

Xulgado en consello de guerra en Pontevedra polo delito de rebelión militar o día 12/05/1937, na causa 79/36, co resultado de sentenza á pena de morte.

Neste consello de guerra xulgaron a: Germán Chapela Leiro, mariñeiro; José Gallego Nogueira, mariñeiro; Gumersindo Gastiasoro Ruiz de Azúa, mestre; Ángel-Francisco-Jesús Martínez Fandiño, mariñeiro; José Meis Martínez, mestre; José-Gabriel Mejuto Bernárdez, mecánico; Agustín Sanjuan Sansinenea, mecánico.

Detido no Frontón de Vigo e na Colonia Penitenciaria da Illa de San Simón, Redondela (Pontevedra).

Ese día 27 de xullo fusilaron na Caeira a: Antonio Fernández Fernández, albanel; José Gallego Nogueira, funcionario; José Meis Martínez, mestre, José Mejuto Bernárdez, mecánico, e Francisco Varela Garrido.

Morte rexistrada en Pontevedra por mor dunha hemorraxia interna por fusilamento.

As súas 34 cartas dirixidas a familiares desde a prisión publicáronse e consérvanse na Real Academia Galega (RAG).