Rico Cobas, Mario

Caldeireiro, escritor, político e anarcosindicalista, 33 anos. Veciño de Ferrol. Era o maior de catro irmáns, dos que se tivo que encargar pois quedaron orfos. Caldeireiro da construción naval.

Militante da CNT, do Partido Sindicalista (PS) desde 1934 e do Sindicato da Industria Naval de Ferrol. Concelleiro de Ferrol polo PS no ano 1936.

Dirixiu o xornal Cultura Proletaria e colaborou con El Gráfico, Solidaridad Obrera, Ferrol Libre e CNT; tamén estreou varias obras de teatro de temática social.

Defensor do Estatuto de Autonomía de Galicia (EAG).

Colaborou coa Escola Racionalista de Ferrol.

Paseado.

Detido o 21/07/1936 polos franquistas, acusárono de sabotaxe e ingresárono na prisión militar do Arsenal ferrolán.

Morte rexistrada en Ferrol a causa de feridas de arma de fogo a mans da forza pública franquista.

Fusilárono nun monte de San Felipe, en Ferrol, segundo a versión oficial, onde o levaran con outras persoas na procura dun suposto depósito de armas; na realidade asasináronos no cemiterio de Canido.

Segundo a versión oficial morreron nun intento de fuga, pero realmente pasearon en Canido, o día 18/08/1936, a: Guillermo Cedrón Gómez, comerciante; Antonio Fernández Mourente, mecánico; Manuel González Díaz, empregado; Felipe Hermida González, funcionario; Ramón Hermo Miranda, militar; Andrés Iglesias Garrote, militar; Venancio Pérez Blanco, empregado; Carlos Pérez Fachal, electricista; Mario Rico Cobas, caldeireiro e escritor, e José Rico Torrente, militar.

Soterrárono no cemiterio de Canido.