Acuña Iglesias, Consuelo

Traballo na casa, 54 anos. Solteira; tiña un fillo: Manuel, que tiña unha discapacidade. Irmá de Ramón Acuña Iglesias, tamén executado e de Manuela Acuña Iglesias, vítima colateral.

Executada.

Ao fuxido Juan-Manuel Gómez Corbacho localizárono na Torre, San Martiño de Salcedo, Pontevedra, e organizouse unha batida, que dirixía o xefe da Garda Cívica de Pontevedra, Víctor Lis Quibén, con 20 gardas cívicos e catro gardas civís, que comandaba o cabo Jesús Barja Vázquez. Os represores achegáronse a Salcedo o día 12 e encamiñáronse á casa de Ramón Acuña Iglesias, empregado de tranvías; alí tamén atoparon á súa irmá Consuelo Acuña Iglesias e á moza de González Corbacho, Elvira Lodeiro González.

Despois de “hábiles” interrogatorios souberon que Gómez Corbacho e Manuel Méndez Montes se agochaban nunha chabola preto da casa; Manuel estaba casado coa irmá de Consuelo, Manuela Acuña Iglesias. Prendéronlle lume á chabola e, ao tentar fuxir, Juan-Manuel morreu tiroteado; Méndez Montes morreu queimado dentro da caseta.

A Ramón, a Consuelo e a Elvira prendéronos e xulgáronos en consello de guerra sumarísimo o 13 de decembro; o fiscal pediu para os tres a pena de morte.

A Ramón e a Consuelo fusilounos un piquete da Garda Cívica, ao mando de Víctor Lis Quibén, na Avenida Monte Porreiro, Santa María de Mourente, Pontevedra, ás 04:00 h do luns 14 de decembro.

Morte rexistrada en Pontevedra a causa de parálise dos centros cardíaco e respiratorio.

A Elvira, que dicía estar en cinta, asasinárona o sábado 19 de decembro.