Alonso Paz, Emilio-Deogracias

Industrial e político, 58 anos. Casado. Veciño de Siador. Pai de Luis Alonso García, procesado, e curmán de Antonio-Hipólito Alonso Ríos.

Na II República elixírono alcalde de Silleda de 1932 a 1934, ano no que dimitiu e sucedeuno Segundo Arceo Díaz, logo encarcerado. Militante de Esquerda Republicana (ER). Despois das eleccións de 1936 recuperou a alcaldía.

Fuxido. Encarcerado. Executado.

Despois do golpe dos militares rebeldes constitúese o Comité de Defensa da República no que se integran, entre outras persoas: Emilio-Deogracias Alonso Paz, industrial; Antonio Costoya Ares, carpinteiro; Daniel Sánchez Mallo, barbeiro, e Antonio Valladares González, axente comercial. Moitos obreiros súmanse á resistencia fronte aos golpistas e o día 20 de xullo incáutanse armas e unha columna de milicianos sae cara Pontevedra; tiveron que regresar e detívoos a Garda Civil.

O alcalde foxe a Portugal o día 21/08/1936; alí delatárono, prendérono e entregárono ás autoridades franquistas na fronteira de Tui (Pontevedra).

Xulgado en consello de guerra en Pontevedra polo delito de rebelión militar co resultado de sentenza á pena de morte.

Ingresado na Colonia Penitenciaria da Illa de San Simón, Redondela (Pontevedra).

Fusilado ás 18:30 h no quilómetro 1 da Avenida de Uruguai, en Monte Porreiro.