Cabaleiro Amoedo, Antonio

Labrego, 25 anos. Veciño de San Xoán de Cabeiro. Fillo de solteira de Emilia Cabaleiro Amoedo, asasinada co seu fillo.

Paseado.

Despois do golpe militar Emilia e o seu fillo Antonio buscaron refuxio en Porto Cabeiro para catro homes de Vigo (Pontevedra), eran os últimos meses de 1936. Á nai e ao fillo espiounos un veciño ata que puido coñecer o agocho que empregaban.

O día 13/02/1937 un amplo operativo de gardas civís, gardas cívicos e falanxistas, ao mando do sarxento Miguel Marcos, poñen cerco á casa de Emilia e Antonio; torturaron á nai a ao fillo para que desen información das persoas que acubillaban e da axuda que lles prestaban. Foron tres días dun auténtico martirio.

O día 16/02/1937 prenderon a: Manuel Vázquez Lamas, empregado de arbitrios; Higinio Fernández Fernández, zapateiro, e Antonio Alonso Comesaña, carpinteiro.

Morte rexistrada no Alta da Concheira, na estrada Vigo-Redondela, a causa de feridas producidas por proxectil de arma de fogo.

Xuntos, no mesmo lugar e data, executaron a: Antonio Alonso Comesaña, Antonio Cabaleiro Amoedo, Emilia Cabaleiro Amoedo, Higinio Fernández Fernández e Manuel Vázquez Lamas. Os corpos de Emilia e do seu fillo tiñan sinais de torturas, mutilados e cribados a balazos; ademais a Emilia cortáronlle os peitos e metéronlle na boca o pene e os testículos do seu fillo.

Soterrárono nunha fosa común no cemiterio dos Eidos, en Redondela.

Embargáronlles mobles e enxoval no expediente A-16 .